A! KAOBERDI
Ka ten Kusa mas Kasabi
Ki nhu sta longi’l tera nho
Ka xintadu
Ka sakedu
Ka na sonu
Ka Kordadu
Ka mo zdreta
Ka mo skerda
Ka ntende
Ora norti
Ora sul
Ta nabega riba d’agu
Sen un napundi certu
Bo ki ben bu larga tera
Bu dexa mai
Bu dexa kretcheu
Bu larga tudu
Pamo ancia’l ben mas ki fika
Má ken ki ben sta fadigadu
Ku xintidu so na bai
Si ben e sabi
Fika e riba’l sabi.
Nharmunt!
Sukuta bu obi
Dexa família e ka nada
Dexa tera e suportavi
Ma dor di sodadi
E cima dor di duença fraka
Ki ta rukuti bida
Ta legra alma
O ki xintidu kore na bai
Ka ten ramedi
Nin korenti ki ka ta sapa
Cimé na mundu largu
Rodiadu di galantaria
Buxu’l dinheru branku
Sta bu força’l trabadju
O ki nobidadi ben na karta
Bu koraçan tristi
Ta bira mas kontenti
Notícia sabi ta fase tchira
Kei kasabi ta dizanimabu.
Hharmun!
Aian! Sukuta bu obi
Nos tera é pobri
Di tchada limpo kutelo seku
Rubera baziu
Rotcha kran ta djobe ceu
Sol forti raganhadu
Ceu azul mar d’anil
Ta suluça n’area mortu
Nubris branku ta lora dibagar
Ta kuda ingratidan di tchuba
mocinhus na storia
Na sombra d’impena
Noti serenu luarentu
Violon de tadu na petu’l kriolu
Morana maguadu na boka’l kantista
Batisadu kuarata
Kasamentu sabru
Badju sabi na son di gaita
Batuku kenti grogu na kalman
Fogueti na len festa no guentis
Preta bunita di odju grós
Kabelu stendedu rostu lorondu
Korpu filadu na nó di sulada
Ta sakudi koxa na finaçan di cimboa
Nharmun!
Aian! Sukuta bu obi
É keli ki ata barian xintidu
Ta pon ta boita ra raboita
Cima don-dagu na rubera
Cima pitada kan-kan fedi
Mi! Mi li!
Djan ba Kaoberdi
La Kura’l nha duença
Ramedi nha fronta
Pan bá diskança xintidu
AH! KAOBERDI!
LARGAU DJA SO SI... ...
Káká Barbosa
“SON DI NÔS ERANSA”
Virgilio Rebordão
Página
Principal